ಅಮ್ಮನ ವಿರುದ್ಧ 3 ವರ್ಷದ ಪೋರ ದೂರು ದಾಖಲು
ಚಾಕೊಲೇಟ್ ಕೊಡಲಿಲ್ಲವೆಂದು ಅಮ್ಮನ ವಿರುದ್ಧವೇ ಪೊಲೀಸ್ ಠಾಣೆಗೆ ದೂರು ನೀಡಿದ 3 ವರ್ಷದ ಮುದ್ದು ಬಾಲಕ: ದೇಶಾದ್ಯಂತ ಭಾರಿ ವೈರಲ್ ಆದ ತಮಾಷೆಯ ಘಟನೆ!
ಅಮ್ಮ ಚಾಕೊಲೇಟ್ ಕೊಡಲಿಲ್ಲವೆಂದೋ ಅಥವಾ ಕೈಯಿಂದ ಕಸಿದುಕೊಂಡರೆಂದೋ ಮಕ್ಕಳು ಹಠ ಮಾಡುವುದು, ಅಳುವುದು ಸಾಮಾನ್ಯ. ಆದರೆ ಇಲ್ಲೊಬ್ಬ ಮೂರು ವರ್ಷದ ಪುಟ್ಟ ಬಾಲಕ ತನ್ನ ಅಮ್ಮನ ಮೇಲೆಯೇ ಪೊಲೀಸ್ ಠಾಣೆಗೆ ಹೋಗಿ ದೂರು ನೀಡಿರುವ ಅಪರೂಪದ ಹಾಗೂ ತಮಾಷೆಯ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದ್ದು, ಪ್ರಸ್ತುತ ಇದು ದೇಶಾದ್ಯಂತ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.
ಘಟನೆಯ ಹಿನ್ನೆಲೆ ಏನು?
ಮಧ್ಯಪ್ರದೇಶದ ಬುರ್ಹಾನ್ಪುರ ಜಿಲ್ಲೆಯ ಡೇಡ್ತಲಾಯಿ ಗ್ರಾಮದ ಹಮ್ಜಾ ಎಂಬ 3 ವರ್ಷದ ಪುಟ್ಟ ಬಾಲಕನಿಗೆ ಚಾಕೊಲೇಟ್ ಅಂದ್ರೆ ಪಂಚಪ್ರಾಣ. ಅತಿ ಹೆಚ್ಚು ಚಾಕೊಲೇಟ್ ತಿನ್ನುತ್ತಿದ್ದರಿಂದ ಆರೋಗ್ಯದ ಹಿತದೃಷ್ಟಿಯಿಂದ ಆತನ ತಾಯಿ ಚಾಕೊಲೇಟ್ ತಿನ್ನದಂತೆ ತಡೆದಿದ್ದಾರೆ. ಅಷ್ಟೇ ಅಲ್ಲದೆ, ಆತನ ಕೈಯಲ್ಲಿದ್ದ ಚಾಕೊಲೇಟ್ ಕಸಿದುಕೊಂಡು ಮುದ್ದುಗೆ ಸಣ್ಣದಾಗಿ ತಟ್ಟಿದ್ದಾರೆ.
ಅಮ್ಮನ ಈ ಕ್ರಮದಿಂದ ತೀವ್ರ ಕೋಪಗೊಂಡ ಪುಟ್ಟ ಹಮ್ಜಾ, "ನನ್ನ ಅಮ್ಮನ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲೇಬೇಕು" ಎಂದು ಹಠ ಹಿಡಿದಿದ್ದಾನೆ. ಸುಮ್ಮನೆ ಕೂರದೆ, ತಂದೆಯ ಜೊತೆ ನೇರವಾಗಿ ಸ್ಥಳೀಯ ಪೊಲೀಸ್ ಚೌಕಿಗೆ ತೆರಳಿದ್ದಾನೆ!
ಪೊಲೀಸ್ ಠಾಣೆಯಲ್ಲಿ ಮುದ್ದು ಬಾಲಕನ ಹೈಡ್ರಾಮಾ!
ಠಾಣೆಯೊಳಗೆ ಕಾಲಿಟ್ಟ ಪುಟ್ಟ ಹಮ್ಜಾ ನೇರವಾಗಿ ಅಲ್ಲಿನ ಮಹಿಳಾ ಸಬ್ಇನ್ಸ್ಪೆಕ್ಟರ್ ಪ್ರಿಯಾಂಕಾ ನಾಯಕ್ ಅವರ ಬಳಿ ತೆರಳಿದ್ದಾನೆ. ಮುಖದಲ್ಲಿ ಸಿಟ್ಟು ತುಂಬಿಕೊಂಡು, "ಅಮ್ಮ ನನ್ನ ಚಾಕೊಲೇಟ್ಗಳನ್ನು ಕದಿಯುತ್ತಾಳೆ, ನನ್ನನ್ನು ಹೊಡೆಯುತ್ತಾಳೆ! ಕೂಡಲೇ ಈಕೆಯನ್ನು ಜೈಲಿಗೆ ಹಾಕಿ" ಎಂದು ಮುಗ್ಧತೆಯಿಂದ ದೂರು ನೀಡಲು ಶುರು ಮಾಡಿದ್ದಾನೆ!
ಬಾಲಕನ ಈ ಮುದ್ದು ಮಾತುಗಳನ್ನು ಕೇಳಿ ಅಲ್ಲಿದ್ದ ಪೊಲೀಸರೆಲ್ಲರೂ ದಂಗಾದರು. ಸಬ್ಇನ್ಸ್ಪೆಕ್ಟರ್ ಪ್ರಿಯಾಂಕಾ ನಾಯಕ್ ಅವರು ಬಾಲಕನ ಮುಗ್ಧತೆಯನ್ನು ಕಂಡು ನಗುತ್ತಲೇ, ಅತ್ಯಂತ ಪ್ರೀತಿಯಿಂದ ಆತನ ದೂರು ಆಲಿಸಿದರು.
ಅಧಿಕಾರಿಯ ಮೃದು ಧೋರಣೆ ಮತ್ತು ಬಾಲಕನ ಖುಷಿ..
ಬಾಲಕನ ಆಕ್ರೋಶವನ್ನು ತಣಿಸಲು ಮುಂದಾದ ಪೊಲೀಸ್ ಅಧಿಕಾರಿ ಪ್ರಿಯಾಂಕಾ ನಾಯಕ್, ತಕ್ಷಣವೇ ಒಂದು ಕಾಗದ ಮತ್ತು ಪೆನ್ನು ತೆಗೆದುಕೊಂಡು ಆತ ಹೇಳಿದ ಪ್ರತಿಯೊಂದು ದೂರನ್ನು ಗಂಭೀರವಾಗಿ ಬರೆಯುವಂತೆ ನಟಿಸಿದರು! ಅಷ್ಟೇ ಅಲ್ಲದೆ, ಕಾಗದದ ಮೇಲೆ ಬಾಲಕನಿಂದಲೇ ಸಣ್ಣದಾಗಿ ಗೀಚಿಸಿ 'ಸಹಿ'ಯನ್ನೂ ಪಡೆದುಕೊಂಡರು.
ಕೊನೆಗೆ, "ನಿನ್ನ ಅಮ್ಮನ ಮೇಲೆ ನಾವು ಖಂಡಿತ ಸೂಕ್ತ ಕ್ರಮ ಕೈಗೊಳ್ಳುತ್ತೇವೆ" ಎಂದು ಅಧಿಕಾರಿ ಭರವಸೆ ನೀಡಿದ ಮೇಲಷ್ಟೇ ಹಮ್ಜಾ ಮುಖದಲ್ಲಿ ಮಂದಹಾಸ ಮೂಡಿತು.
ಚಿಕ್ಕ ಮಗುವಿನ ಮುಗ್ಧ ನಡೆ ಹಾಗೂ ಪೊಲೀಸ್ ಅಧಿಕಾರಿಯ ಮಾನವೀಯ ಹಾಗೂ ಪ್ರೀತಿಯ ಸ್ಪಂದನೆ ಈಗ ಜಾಲತಾಣಗಳಲ್ಲಿ ಕೋಟ್ಯಂತರ ಜನರ ಮನ ಗೆದ್ದಿದೆ. ಈ ವಿಡಿಯೋ ನೋಡುಗರ ಮೊಗದಲ್ಲಿ ನಗು ಮೂಡಿಸುವುದಂತೂ ಖಂಡಿತ!
